Μᾶρκος ὁ Ἀσκητής – Περὶ τῆς ἐνανθρωπήσεως τοῦ κυρίου ἡμῶν Ἰησοῦ Χριστοῦ πρὸς Νεστόριον

Λόγος δογματικός Πρὸς τοὺς λέγοντας μὴ ἡνῶσθαι τὴν ἁγίαν σάρκα μετὰ τοῦ Λόγου, ἀλλ’ ὡς ἱμάτιον μονομερῶς περικεῖσθαι καὶ διὰ τοῦτο ἄλλως μὲν ἔχειν περὶ τὸν φοροῦντα, ἄλλως δὲ περὶ τὸν φορούμενον Ἐπειδὴ πολλάκις ἡμῖν παρεζητήσατε τὰς περὶ πίστεως πρὸς τοὺς ἐναντίους ἀποκρίσεις ἅμα καὶ τὰς ἐκείνων ἀντιθέσεις, εὐθὺ καὶ τὰς διχονοίας τῶν ἀμφιρρεπῶν ἀνθρώπων παρεξετάσαντες, τούτου χάριν ἠναγκάσθημεν εἰπεῖν κατὰ δύναμιν προφήσαντες τὸ τῆς διχονοίας τῶν πολλῶν αἴτιον.

Ἐπειδὴ ἡ μὲν ἀλήθεια ἐκ τῶν κατ’ αὐτῆς ἔργων τοῖς οἰκείοις ἐρασταῖς ἀποκαλύπτεται, ἡ δὲ πλάνη ἐκ τῶν ἐφαμίλλων αὐτῇ πράξεων τοῖς ἀγχιστεύουσιν ἐμφανίζεται —ἀληθείας δὲ ἔργον πόνου καὶ ἀτιμίας ὑπομονή, πλάνης δὲ ἐπαίνου καὶ ἡδονῆς καταδοχή—, τούτου χάριν ἡ μὲν προτέρα δυσπαράδεκτος διὰ τὸν πόνον, ἡ δὲ δευτέρα εὐεπιτήδευτος διὰ τὴν ἡδονὴν τῷ πλήθει γέγονεν. Καὶ οἱ μὲν φιλόπονοι τὸν δι’ ἡμᾶς σταυρωθέντα καὶ αἰσχύνης καταφρονήσαντα, ὁμολογοῦσι διδάσκαλον καὶ δεσπότην καὶ Κύριον Υἱὸν Θεοῦ, οἱ δὲ φιλήδονοι, μᾶλλον δὲ κενόδοξοι, τοῦτον ὁμολογεῖν ἐπαισχύνονται.

Τούτων δὲ τῶν δύο μερῶν οὕτως μαχομένων, τινὲς ἀμφιρρεπεῖς ἄνθρωποι ὁρῶντες τὴν προειρημένην ἐναντιότητα καὶ μὴ εἰδότες διακρίνειν τὸ κρεῖττον ἀπὸ τοῦ χείρονος, τὴν ἀληθῆ πίστιν ἄδηλον εἶναι ἐνόμισαν. Οὗτος δὴ οὖν ὁ τρόπος τῆς τούτων διχονοίας· περὶ δὲ τῶν ἐναντίων παραλλαγῆς ὅτι πλανῶνται, πᾶσα μὲν πείθει τοὺς φιλοπόνους ἡ θεία Γραφή, ἀναγκαίως δὲ τὸ σκεῦος τῆς ἐκλογῆς ὁ μακάριος Παῦλος, ὃς καὶ ἀγνοοῦντας ἡμᾶς διεγείρει πρὸς τὴν ἀλήθειαν καὶ τοῖς ἐχθροῖς τοῦ σταυροῦ ἀντιπολεμεῖν ἀναγκάζει, οὐ μόνον Ἰουδαίοις ἀλλὰ καὶ τοῖς ἐφαμίλλοις αὐτῶν αἱρετικοῖς. Καθάπερ γὰρ ἐκείνους ὁμοίως καὶ τούτους ἐχθροὺς ὠνόμασεν, εἴπερ ὁ ὢν ἐχθρὸς ἐκεῖνος καὶ ὀνομάζεται. Εἰ μὲν γὰρ ψιλὸν ἄνθρωπον οὐ λέγουσι τὸν ἐσταυρωμένον Χριστὸν καὶ τῆς ἰουδαικῆς ἔχθρας οὐ μετέχουσι, μηδὲ ἐχθροὶ ὀνομαζέσθωσαν. Εἰ δὲ τὰ αὐτὰ ἐκείνοις φρονοῦσι, πῶς τὸν χρηματισμὸν ἀποδράσωσιν; Ἐπὶ πᾶσι γὰρ ἡ τῶν πραγμάτων ἀγχιστεία ἀπαραίτητον ἔχει τῶν ὀνομάτων τὴν οἰκειότητα.