Ἰωάννης ὁ Χρυσόστομος – Εἰς τὸ «Ἐὰν ἀφῆτε τοῖς ἀνθρώποις τὰ παραπτώματα αὐτῶν»

[Τοῦ αὐτοῦ] εἰς τὸ Ἐὰν ἀφῆτε τοῖς ἀνθρώποις τὰ παραπτώματα αὐτῶν, καὶ ὁ πατὴρ ὑμῶν ὁ οὐράνιος ἀφήσει ὑμῖν τὰ παραπτώματα ὑμῶν. Πρώην ὁ σωτὴρ ἡμῶν κατὰ τὴν τῶν ἁγίων εὐαγγελίων παράδοσιν ἐδίδαξεν ἡμᾶς, ὅπως χρὴ τὰς προσευχὰς ἡμῶν καθαρὰς ἀναπέμπειν αὐτῷ, δίχα πάσης ὀργῆς, δίχα πάσης ἔχθρας, ὥστε μὴ κατεύχεσθαι ἢ καταρᾶσθαι τῶν ἐχθρῶν· τοῦτο γάρ ἐστι μὴ βαττολογεῖν ἐν ταῖς προσευχαῖς τὸ μηδὲν ἀνάξιον τοῦ θεοῦ αἰτεῖν παρ’ αὐτοῦ.

Ἀλλὰ νῦν μετὰ τὴν ἁγίαν ἐκείνην προσευχὴν ἐξ ἀκολουθίας τῶν εὐαγγελικῶν ἀναγνωσμάτων ἔλεγεν· «Ἐὰν ἀφῆτε τοῖς ἀνθρώποις τὰ παραπτώματα αὐτῶν, καὶ ὁ πατὴρ ὑμῶν ὁ οὐράνιος ἀφήσει ὑμῖν.» Ταῦτα δὲ πάντα καθάπερ φιλόστοργος διδάσκαλος διδάσκει ἡμᾶς πρὸς ὠφέλειαν τῶν ψυχῶν ἡμῶν. Οὐ γάρ ἐστί τις ἐπὶ τῆς γῆς, οὐ πατήρ, οὐ μήτηρ, οὐκ ἀδελφός, οὐ φίλος, ἀγαπήσας ἡμᾶς ὡς ἠγάπησεν ἡμᾶς Χριστὸς ὁ θεός. Καὶ τοῦτο μάλιστα σαφῶς ἐπιστάμεθα ἐξ ὧν ἡμᾶς εὐεργετεῖ καὶ ἐξ ὧν νουθετεῖ καθ’ ἑκάστην ἡμέραν ὁ κτίσας ἡμᾶς.