Θεόδωρος ὁ Στουδίτης – Ἐπιτιμία

☩ Τοῦ ὁσίου πατρὸς ἡμῶν καὶ ὁμολογητοῦ Θεοδώρου ἡγουμένου τῶν Στουδίου (ου ex ω), ἐπιτίμια κοινὰ τῆς ὅλης ἀδελφότητος ἐπὶ τῶν παραλειπόντων ἐν τῇ Ἐκκλησίᾳ εἰς τὸν κανόνα αʹ. Ὁ μὴ εὑρισκόμενος εἰς τὴν εἴσοδον τοῦ Δόξα ἐν ὑψίστοις Θεῶ, ἄνευ ἀσθενείας, ἢ ἑτέρας εὐλόγου κατοχῆς, ἱστάσθω μέσον παραστηκέτω, ἢ ξηροφαγείτω, ἢ καὶ ἄσιτος μενέτω ἕως τῆς ὡρισμένης ὥρας τῇ ἑξῆς ἡμέρᾳ:—

βʹ. Ὁ μετὰ τὴν εὐχὴν τῆς ἐγέρσεως τῆς τραπέζης, μὴ ἀπιὼν καθὼς διατέτακται, βαλλέτω μετανοίας κʹ. γʹ. Ὁ ὁμιλῶν ἐν ταῖς συνάξεσι, καὶ καταργῶν τὸν πλησίον ἀπὸ τῆς θείας δοξολογίας, μετὰ μίαν ὑπόμνησιν εἰ οὐ σιωπήσει, μετανοίας κʹ:—

δʹ. Ὁ μὴ εὑρισκόμενος ἐν ταῖς τρισὶ κατηχήσεσι τῆς ἑβδομάδος, ἄνευ αἰτίας εὐλόγου, ξηροφαγείτω:— εʹ. Ὁ συντυγχάνων ἀπὸ τῶν ἀποδείπνων, μετανοίας νʹ:— ϛʹ. Ὁ παρὰ τὴν ὡρισμένην ἄνεσιν ἀναπατῶν, καὶ περιερχόμενος ἐν τῷ μοναστηρίῳ, ἀφοριζέσθω, ἤγουν κατακλειέσθω ἡμέραν μίαν:—

ζʹ. Ὁ ἀφ’ ἑτέρου ἐργαστηρίου, εἰς ἕτερον μετερχόμενος, ἄνευ καθηκούσης αἰτίας, ἀφοριζέσθω, ἤγουν κατακλειέσθω ἡμέραν μίαν:— ηʹ. Ὁ μὴ συντρέχων μετὰ προθυμίας κατὰ πάντα καιρὸν ἐργασίας τοῖς λοιποῖς ἀδελφοῖς, κατακλειέσθω ἡμέραν μίαν:—

θʹ. Πᾶς ὁ ἐργοχειριάτης, μὴ ἐν ἡσυχίᾳ ἐργαζόμενος, ἀλλ’ ἀνακινῶν ξένας ὁμιλίας, ἀφοριζέσθω, ἤγουν κατακλειέσθω ἡμέραν μίαν:— ιʹ. Ὁ εὑρισκόμενος ἐν παντὶ κλέμματι, ἀφοριζέσθω, ἤγουν κατακλειέσθω ἑβδομάδα μίαν:—

ιαʹ. Ὁ κραυγάζων παρὰ τὸ εἰκός, βαλλέτω μετανοίας λʹ:— ιβʹ. Ἐὰν εὑρεθῆ τινὸς τί κατὰ πάντα τόπον πάρεξ τῶν δεδομένων μετὰ εὐλογίας, καὶ τἀῦτα μὲν ἀφαιρείσθω, κἀκεῖνος δὲ ξηροφαγείτω:— ιγʹ. Ἐάν τις ἔχη ἀνεξάγγελτόν τι, ἢ καὶ ἄνευ τῶν ὡρισμένων ἐξαγγείλῃ τινί, ἀφοριζέσθω, ἤγουν κατακλειέσθω ἡμέραν μίαν:—

ιδʹ. Ἐάν τις διερχομένων τῶν δύο ἑβδομάδων, μὴ ἐξαγγείλῃ εἰς τὸν ἡγούμενον δυνάμενος, ἀφοριζέσθω ἡμέραν αʹ. ιεʹ. Εἴ τις τινὸς ἀνέχεται καταλαλοῦντος, καὶ ἢ μὴ αὐτὸς ἐπιδιορθώσηται τὸν καταλαλοῦντα, ἢ οὐκ ἀνεχόμενον ἀνενέγκῃ τῷ προεστῶτι, μετανοίας ρʹ:— ἐκατὸν ποιησάτωσαν οἱ ἀμφότεροι:—

ιϛʹ. Εἴ τις εὑρεθῆ λάθρα τοῦ προεστῶτος γράφων τινί, ἢ δεχόμενος γράμματα, ἀφοριζέσθω, ἤγουν κατακλειέσθω ἡμέρας γʹ:— ιζʹ. Ὁ καλούμενος ὑπό τινος ἀδελφοῦ, καὶ μὴ εὐθὺς ἀποκρινόμενος τῆς κλήσεως, οὐ μακρὰν οὔσης, μετανοίας λʹ:—

ιηʹ. Πᾶς ὁ φατριάζων κατὰ τοῦ προεστῶτος, καὶ συνταράσσων τὴν ἀδελφότητα, ἀφοριζέσθω, ἤγουν κατακλειέσθω ἑβδομάδα μίαν:— ιθʹ. Εἴ τις ἀκαίρως ἔρχεται εἰς τὸ ἑψητήριον, ἢ εἰς τὸ κελλάριον ἐκτὸς τῶν ἐντετυπωμένων καὶ τῶν φροντιζόντων τῆς εὐταξίας, ἀφοριζέσθω, ἤγουν κατακλειέσθω ἡμέραν μίαν:—

κʹ. Εἴ τις ὡς ἔτυχεν ἐξελθὼν εἰς ἀγάπην, ἐν τῇ ὑποστροφῇ διηγήσοιτο τὰ συμβ[άντα καθ’ οἷον δήποτε] τρόπον μάλιστα ἐν τῇ τραπέζῃ ἐκτὸς τ[ῶν ἐρωτω]μένων ὑπὸ τοῦ προεστῶτος κατακλειέσθω ἡμ[έραν ...] καʹ. Ὁ συνεγνωκὼς ἀδελφοῦ τὴν ἐκ [τοῦ μ]οναστηρίου [ἔξο]δον, ἢ συνομιλήσας, ἢ συνε̣υ̣..σας καὶ μὴ προαν[αγγεί]λας, ἀφοριζέσθω ἑβδομάδα μίαν:—